Lýst eftir stöðugleika

Formaður Samfylkingarinnar lýsir eftir stöðugleika ríkisstjórninarinnar, misskipting sé að aukast, verðbólgan aukist, vextir hækki og skuldir heimilanna vindi stöðugt utan á sig. Formaður Vinstri - grænna segir ríkisstjórnina í afneitun á jafnvægisleysið í efnahagslífinu. Öll met hafi verið slegin í skuldasöfnun en munurinn sé sá að þær hafi nú lagst á sveitarfélögin og heimilin í landinu. Formenn stjórnarandstöðuflokkanna tóku fremur dræmt undir fjármálafrumvarpið eftir að því var dreift á Alþingi í dag. Meðal annars var ástandinu í ríkisfjármálunum líkt við veislu þangað sem sumum væri boðið en aðrir sætu heima.   Ingibjörg Sólrún Gísladóttir, formaður Samfylkingarinnar, segir að tekjur ríkissjóðs hafi tvöfaldast í tíð þessarar ríkisstjórnar, en útgjöldin hafi gert það líka. Hún segir að það veki athygli að ríkisstjórnin tali um að halda áfram að viðhalda stöðugleika en hún spyr á móti hvaða stöðugleika. Vextir séu að hækka, verðbólga er að vaxa, heimilin hafa aldrei verið skuldsettari, misskipting tekna í samfélaginu er að vaxa og því spyr Ingibjörg hvar er þessi stöðugleiki. Steingrímur J. Sigfússon, formaður Vinstri - grænna, segir fyrst vekja athygli að fjármálaráðuneytið reyni að fegra myndina í sinni þjóðhagsspá umfram það sem komi fram í nýrri spá Seðlabankans. Ríkisstjórnin sé í afneitun og vilji ekki horfast í augu við jafnvægisleysið í þjóðarbúskapnum. Steingrímur segir að þetta sé einfalt, það er einn aðili sem hefur greitt niður skuldir og sendur vel en það er ríkissjóður og því beri að fagna. Þegar litið sé hins vegar á heildarmyndina sést að allar hinar máttarstoðir samfélagsins hafi safnað skuldum það er heimilin, sveitarfélögin og atvinnulífið. Í heild er þjóðarbúið skuldsettara en nokkurn tímann fyrr og staðan að því leyti staðan mjög alvarleg. Samt er gert ráð fyrir áfram haldandi hallarekstri þjóðarbúsins svo nemur um fimm hundruð milljörðum króna, þegar tekið er tímabilið frá því núna og til 2010. Sá viðskiptahalli bætist við erlendar skuldir þjóðarinnar. Góðærið er því tekið að láni, þetta er veisla og það er slegið fyrir reikning. Guðjón Arnar Kristjánsson, formaður Frjálsynda flokksins, segir að vissulega sé til mikið af peningum en þeim sé misskipt. Frumvarpið endurspegli það, ekki síst skattalagabreytingar ríkisstjórninarinnar. Þá sé skorið niður vegna þenslu, líka í þeim kjördæmum þar sem þenslan sé engin. Guðjón segir að verið sé að missa niður atvinnu á ýmsum stöðum á landinu út af rækuvinnslunni og sjávarbyggðir á landinu sitji ekki við feitan gölt.