Kom mörgum í opna skjöldu

Ákvörðun Davíðs að láta af þingmennsku og ráðherraembætti kom mörgum helstu samstarfsmönnum hans í opna skjöldu sem vildu ekki trúa því þótt sagt hefði verið frá því í hádegisfréttum fréttastofu Stöðvar 2 og Bylgjunnar í dag. Ákvörðun Davíðs hefur keðjuverkandi áhrif á ýmsa. Nú mun varaformaðurinn, Geir H. Haarde, stefna að því að verða formaður á næsta landsfundi. Hann segist bíða þess sem verða vilji í þeim efnum. Geir segir ekki stefnubreytinga að vænta í utanríkisráðuneytinu þegar hann taki við enda fylgi þeir sömu stefnunni í Sjálfstæðisflokknum og ríkisstjórninni. Hann hlakki til að fá að glíma við ný verkefni. Hann hafi löngum haft mikinn áhuga á utanríkis- og alþjóðamálum og þótt gaman hafi verið að vinna í fjármálaráðuneytinu í sjö og hálft ár, þar sem hann telji sig skila góðu búi, sé líka gaman að breyta til. Árni M. Mathiesen segir ákvörðun Davíðs breyta miklu fyrir starf flokksins. Davíð hafi verið afgerandi formaður í langan tíma. Þeir hafi komið saman inn á þing árið 1991 og hafi ekki verið í stjórnmálum nema undir forystu hans. Nýi ráðherrann í ríkisstjórninni, Einar K. Guðfinnsson, tekur við forystu á sviði sjávarútvegsins. Aðspurður hvort þetta sé ráðuneyti sem hann hafi langað í segist Einar ekki getað neitað því. Þetta sé málaflokkur sem hann hafi starfað inn, bæði sem þingmaður og innan sjávarútvegsins. Hann telji þetta heillandi umhverfi og atvinnugreinina sömuleiðis og hann telji að það verði gaman að fara að vinna með kröftugu fólki sem starfi í greininni. Fréttin um að Davíð Oddsson myndi tilkynna í dag að hann hætti í pólitík var fyrst sögð í hádegisfréttum Bylgjunnar. Sumir vildu ekki trúa því. Einar Oddur Kristjánsson sagði Davíð mann á besta aldri og hann spurði hver hætti störfum fyrir sextugt. Honum dytti ekki í hug að halda það. Svo liðu fáeinar klukkustundir. Þá sagði Einar Oddur að einhver hefði spáð því að Davíð Oddsson myndi hætta þegar enginn ætti von á því. Sá spádómur hefði ræst. Hann tæki sína ákvörðun sjálfur og væri eflaust maður til þess. Vonandi hafi að mat hans verið rétt.