Gistinóttum fer fjölgandi

Gistinóttum á hótelum fjölgar sífellt og voru þær í júlí árið 2005 rúmlega 157 þúsund. Gistinætur voru árið á undan 153 þúsund, og því þriggja prósenta aukning á milli ára. Þetta kemur fram á heimasíðu Hagstofu Íslands. Hlutfallslega varð mesta aukningin á Suðurnesjum, Vesturlandi og Vestfjörðum þar sem gistinætur fóru úr 14 þúsundum í 16 þúsund eða um heil 15%. Á höfuðborgarsvæðinu fjölgaði gistinóttum úr tæplega 89 þúsundum í rúmlega 91 þúsund sem er 3% aukning milli ára. Gistinóttum á hótelum í júlí fækkaði hinsvegar á Norðurlandi um 3% og á Suðurlandi 3%. Í júlí árið 2005 voru gistinætur Íslendinga á hótelum rúmlega 17 þúsund á móti rúmlega 14 þúsundum árið á undan, sem er rúmlega 21% aukning. Gistinóttum útlendinga á hótelum fjölgaði hlutfallslega minna eða um 1% milli ára, úr 139 þúsundum í júní árið 2004 í 140 þúsund í júní árið 2005. Athygli er þó vakin á því að hér er átt við gistinætur á hótelum eingöngu, það er hótelum sem opin eru allt árið. Fjölgun ferðalanga hingað til lands hefur verið mikil á undanförnum árum, enda kannski eins gott þar sem hótelum hefur fjölgað hratt og virðist sem ekkert lát ætli að verða þar á.