Gölluðu strætókerfi breytt

Umtalsverðar breytingar á leiðakerfi Strætó voru samþykktar á stjórnarfundi í gær. Þar á meðal að fjölga vögnum, lagfæra tímatöflur og lengja þjónustutíma á tilteknum leiðum. Ágreiningur hefur verið í stjórninni um úrbætur á kerfinu, en þær breytingar sem nú hafa verið samþykktar taka gildi 15. október. Björk Vilhelmsdóttir stjórnarformaður segist vera ánægð með það skref sem stjórnin ákvað að stíga til að bæta úr þeim ágöllum sem komið hafa í ljós á leiðakerfinu og stuðla þannig að bættum almenningssamgöngum. Hún segir að áætlaður kostnaður vegna þessarar breytingar á yfirstandandi fjárhagsári sé allt að 1,5 milljónir króna. Gert sé ráð fyrir að sá viðbótarkostnaður rúmist innan ramma fjárhagsáætlunar ársins. Þau atriði sem stjórn Strætó bs. samþykkti í gær fela í sér að gerðar verða nauðsynlegar lagfæringar á tímatöflum þeirra leiða sem tekst illa að halda áætlun, sérstaklega S1, 11, 13, 14, 22 og 24. Jafnframt verða tengingar á skiptistöðvum milli leiða sérstaklega skoðaðar og þær lagfærðar eftir því sem unnt er. Breytingarnar kalla á rekstur fleiri vagna til viðbótar þeim sem áður var gert ráð fyrir. Vögnum hefur þegar verið bætt inn á sumar leiðanna, að sögn Bjarkar. Þá mun Strætó bs óska eftir samvinnu við sveitarfélögin sem að Strætó standa um gerð nýrra biðstöðva. Þjónustutími Strætó verður lengdur að hluta á leiðum 12 og 16 til miðnættis frá og með 15. október. Þá er hafin úttekt á leiðakerfinu þar sem sérstaklega verður hugað að athugasemdum og ábendingum frá vagnstjórum og farþegum. Enn fremur verður kannað viðhorf til leiðakerfisins og þjónustutímans. Niðurstöður úttektarinnar verða nýttar við endurskoðun leiðakerfisins sem áætlað er að geti átt sér stað um næstu áramót.