Hafa aðeins selt eitt fjöltengi

Ikea hefur innkallað Rabalder-fjöltengi sem hafa verið í sölu um allan heim frá því í apríl á þessu ári en byrjað var að selja vöruna hér á landi þann 10. ágúst. Jóhannes Rúnar Jóhannesson, framkvæmdastjóri Ikea segir þetta vera fyrirbyggjandi aðgerðir en galli varð við samsetningu á einhverjum tengjanna sem getur hafa valdið því að vírar í því hafi marist og skemmst. Skemmd á einangrun vírsins getur valdið því að vírinn sjálfur komist í snertingu við málmhluti innan í fjöltenginu sem leitt getur til hættu á rafstuði frá fjöltenginu sjálfu eða hlutum sem tengdir eru við það. Ekkert slys hefur þó verið skráð þar sem þetta tiltekna fjöltengi á hlut að máli en einungis eitt stykki hefur verið selt úr Ikea-versluninni hér á landi. Jóhannes segist aðspurður að ekki hafi oft orðið vart galla í vörum frá Ikea undanfarin ár. Þótt aðeins hafi verið selt eitt stykki af fjöltenginu skipti það ekki máli að mati Ikea þar sem öryggi viðskiptavina sé forgangsmál og því sé gripið til þessara aðgerða. Aðspurður hvers vegna aðeins eitt stykki hafi verið selt segir Jóhannes að fjöltengið sé nýkomið hingað til lands en á heimsvísu hafi það verið til sölu í lengri tíma. Spurður hvað gert sé til að koma í veg fyrir að svona hlutir endurtaki sig segir Jóhannes að innan Ikea verði farið yfir allar leiðbeiningar og eftirfylgni varðandi framleiðsluferlið og farið sé mjög djúpt í alla sauma í málinu.