Mótmælendur kæra lögregluna

Mótmælendur Kárahnjúkavirkjunar og álvers í Reyðarfirði hyggjast í dag leggja fram kæru hjá Ríkissaksóknara vegna framkomu og vinnubragða lögreglunnar á höfuðborgarsvæðinu og á Austurlandi. Segjast þeir hafa verið lagðir í einelti af einkennisklæddum og óeinkennisklæddum lögreglumönnum og þurft að sæta meðferð sem væru þeir hryðjuverkamenn. Jafnframt hafa þeir falið lögmönnum sínum að andmæla úrskurði Útlendingastofnunar um hugsanlega brottvísun þeirra erlendu mótmælenda sem handteknir voru á Austurlandi í þremur lögregluaðgerðum á tímabilinu 26. júlí til 4. ágúst en þeir voru 21 talsins. Birgitta Jónsdóttir, einn talsmanna mótmælenda, segir um helming þeirra erlendu mótmælenda sem handteknir voru á Austurlandi farna úr landi og þeir verði allir horfnir af landi brott um næstu mánaðamót. Brottvísun hafi því engan tilgang annan en að tryggja að þeir geti ekki komið hingað aftur næstu árin. "Lögregluyfirvöld hafa ítrekað brotið grundvallarmannréttindi okkar og því munum við fara fram á að aðgerðir lögreglunnar sæti opinberri rannsókn. Sum okkar hafa verið handtekin fyrir engar sakir og í fyrradag þvinguðu óeinkennisklæddir lögreglumenn sér leið inn í húsnæði í Reykjavík, þar sem hluti mótmælenda hefur dvalist undanfarna daga, með því að hóta að brjóta upp útidyrnar," segir Birgitta. Gísli M. Auðbergsson, lögmaður á Eskifirði og annar tveggja lögmanna mótmælenda, segir ljóst að lögreglan á Austurlandi hafi einnig gengið hart fram gegn mótmælendum. "Mér finnst fyllsta ástæða til að láta reyna á lögmæti þeirra aðgerða og er ég að undirbúa það," segir Gísli. Katrín Theódórsdóttir, lögmaður eins erlendu mótmælendanna, óskaði í gærmorgun eftir þeim gögnum frá Útlendingastofnun sem úrskurður stofnunarinnar um hugsanlega brottvísun byggir á en segist ekki hafa fengið nein svör. "Jafnframt óskaði ég í gær eftir gögnum frá sýslumannsembættinu á Eskifirði en var tjáð að sökum anna væri ekki hægt að senda þau fyrr en í dag," segir Katrín. Hvorki náðist í yfirmenn Útlendingastofnunar né Þóri Oddsson vararíkislögreglustjóra vegna málsins í gær.