Komnir heim með slitna skó

Göngugarparnir Bjarki Birgisson og Guðbrandur Einarsson komu til Reykjavíkur í gær og luku þar með 46 daga hringferð sinni um landið. "Þetta hefur ekki verið svo erfitt líkamlega en það reynir á þolrifin að vera svona lengi frá sínu fólki," sagði Guðbrandur, þegar þeir komu að Rauðavatni klukkan hálf fjögur í gær og lokuðu hringnum. Bjarki neitaði því ekki að ferðin hafi tekið á enda var skóþvengur hans til merkis um það en hann var tættur mjög. "Þetta er ellefta parið sem ég eyði í ferðinni en Guðbrandur hefur aðeins eytt þremur," upplýsti Bjarki blaðamann. Þeir göngugarpar sögðust vera himinlifandi með viðtökurnar sem þeir hlutu víða um land. Reykvíkingar létu ekki sitt eftir liggja í þeim efnum og var slegið til veglegrar móttökuveislu við Ingólfstorg klukkan fimm í gær og voru tæplega tvö hundruð manns viðstaddir. Þar héldu Árni Magnússon félagsmálaráðherra og Alfreð Þorsteinsson borgarfulltrúi ræður ásamt fleirum og kórinn Blikandi stjörnur söng göngugörpunum til heiðurs. Hvað tekur við hjá þeim að þessari göngu lokinni? "Ég verð að fara að huga að nuddstofunni minni. Svo ætla ég að bregða mér í sveitina og moka skít og skipta um þök á fjárhúsum," sagði Guðbrandur og var greinilega ekki úr sér genginn. Bjarka bíða mörg verkefni en hann ætlar að vinna að barnabók sem hann mun gefa út í vetur og svo ætlar hann að setjast á skólabekk. Þó sagðist hann umfram allt ætla að vara sig á því að fara ekki á næstunni í nudd til Guðbrands þar sem hætta væri á að þá myndu þeir félagar eggja hvorn annan upp í einhverju öðru eins brjálæði eins og að ganga í kringum landið. Það var einmitt í nuddtíma hjá Guðbrandi sem þessi hugmynd þeirra að göngunni kviknaði. Annars segja þeir félagar samkomulagið vera hið þokkalegasta. "Við ætlum þó að taka frí hvor frá öðrum frá og með morgundeginum," sagði Bjarki en var þá minntur á að þeir félagar voru búnir að lofa því að koma fram í sjónvarpsþætti saman svo ekki yrði að þessu fríi strax.