Íbúðaverð hækkar mikið á Akureyri

Fasteignasala á Akureyri hefur verið lífleg frá í fyrra og segja fasteignasalar að flestar tegundir eigna vanti á skrá. Verð á góðum rað- og parhúsum hefur rokið upp frá því í vor og dæmi um að eignir hafi hækkað um 50 prósent á undanförnum 12 mánuðum. Vísitala fasteignaverðs íbúðarhúsnæðis á höfuðborgarsvæðinu hækkaði um 38,8 prósent á sama tíma. Greiningardeildir bankanna telja að fasteignaverð á höfuðborgarsvæðinu sé að nálgast hámark og hætta á offramboði og verðfalli á íbúðarhúsnæði ef ekki dregur úr þenslu í nýbyggingum. Greiningardeildirnar hafa hins vegar ekki skoðað Akureyri sérstaklega. Gísli Gunnlaugsson, hjá Framtíðareign á Akureyri, segir að flestar gerðir eigna vanti á skrá en góð raðhús, parhús og einbýlishús seljist yfirleitt mjög fljótt. "Ég verð var við að fólk á höfuðborgarsvæðinu telji sig geta gert góð viðskipti með því að innleysa hagnaðinn af hækkuninni fyrir sunnan og kaupa eign á Akureyri í þeirri von að fasteignaverð þar fari hækkandi. Eins verð ég var við að Eyfirðingar, til dæmis Dalvíkingar og Ólafsfirðingar, eru í auknum mæli að flytja til Akureyrar," segir Gísli. Daníel Guðmundsson, hjá Eignamiðlun Norðurlands, segir að spákaupmenn og fasteignaheildsalar á höfuðborgarsvæðinu horfi nú meira til Akureyrar og sveitanna í kring en áður varðandi fasteignakaup. "Dæmi eru um að menn að sunnan kaupi tvær og þrjár eignir sama daginn fyrir norðan þar sem þeir telja víst að auðvelt verði að selja eignirnar aftur með góðri ávöxtun," segir Daníel. Tryggvi Pálsson, hjá Fasteignasölunni Holt, segir sífellt færast í vöxt að efnamiklir einstaklingar á höfuðborgarsvæðinu kaupi fasteignir á Akureyri og nágrenni og haldi þar sitt annað heimili. "Mörgum þykir fínt að eiga húseign á Akureyri eða stutt frá bænum eins og í Vaðlaheiði. Fjölgun húsa í Vaðlaheiði er hins vegar ekki að skapi allra sem þar eiga eignir fyrir," segir Tryggvi.