Ummæli Össurar heimskuleg

Það er heimskulegt að halda því fram að Samfylkingin geti boðið fram undir merkjum R-listans ein og sér segir oddviti Vinstri grænna í borgarstjórn. Hann segir Össur Skarphéðinsson vita að það er ekki hægt og skilur ekki hvað honum gengur til með því að viðra slíkar hugmyndir. Á heimasíðu sinni um helgina sagði Össur ef upp úr samstarfinu slitnaði ætti Samfylkingin að bjóða fram ein og sér undir merkjum R-Listans. Árni Þór Sigurðsson, oddviti Vinstri Grænna í R-listanum, segir Össur vita að það sé ekki hægt. Árna finnst yfirlýsinging heimskuleg vegna þess að hún gengu hvorki upp efnislega né tæknilega og hann segir Össur vita það fullvel. Honum finnst yfirlýsing Össurar ekki vel til þess fallin að auðvelda mönnum að ná saman. Samþykki allra flokka þurfi til að nota nafn R-listans og það fáist vitanlega ekki ef upp úr samstarfinu slitni. Aðspurður um hvort að hann telji að viðhorf Össurar endurspegli viðhorf Samfylkingarinnar segir Árni að það sé ekki alveg ljóst þar sem þar séu skiptar skoðanir eins og hjá öðrum. Hann sagði einnig að það væri óþægilegt að fá ekki alveg skýr skilaboð frá þeim sem eru í viðræðunum og hann vonast einnig til þess að þetta viðhorf Össurar sé ekki mjög útbreytt í Samfylkingunni. Spurður um hverjir séu að draga lappirnar í samningaviðræðunum sagði Árni að hann vildi ekki setja merkimiða á neina flokka og að allir væru með sín markmið í svona viðræðum og ræddu saman af heilindum. En þó að Alfreð sætti sig við málgleði Össurar gera það ekki allir. Heimildarmenn fréttastofu úr röðum vinstri grænna og framsóknarflokks segja að mikil óánægja ríki innan þeirra raða. Gert hafi verið samkomulag um að hætta yfirlýsingum út og suður í fjölmiðlum og reyna þess í stað að ræða málin af alvöru. Haldi Samfylkingarmenn áfram að tala með þessum hætti endi það með því að allt fari í háaloft.