Óánægð með frágang við Egilshöll

"Frágangur á umferðarmannvirkjum við Egilshöll er fyrir neðan allar hellur," segir Elísabet Gísladóttir, formaður Íbúasamtaka Grafarvogs. Umferðarhnútar mynduðust við höllina að afloknum tónleikum bandaríska rapparans Snoop Dogg í fyrrakvöld en að sögn Elísabetar getur tekið allt að því þrjár klukkustundir að komast út af bílastæðinu þegar þar eru haldnir mjög fjölmennir viðburðir. Fulltrúar íbúasamtakanna hafa ítrekað bent borgaryfirvöldum á mögulegar lausnir á vandanum að sögn Elísabetar. Þær felist í því að koma fyrir aðrein og frárein að höllinni auk þess að slökkt yrði á umferðarljósum á háannatíma. "Þessum tilmælum okkar hefur ekki verið sinnt," segir Elísabet. "Farið verður í framkvæmdir við Egilshöll síðar á þessu ári og framhaldið er í skoðun," segir Stefán Finnsson, yfirverkfræðingur á Mannvirkjastofu Reykjavíkurborgar. Hægt verður að beygja framhjá ljósagatnamótum til hægri í átt að höllinni þegar framkvæmdum lýkur síðar á árinu að sögn Stefáns. Þá sé verið að skoða frekari aðgengisbætur í ljósi hugmynda um stækkun Egilshallar.