Óafvitandi ekki með réttindi

Meirapróf þarf á flesta þeirra pallbíla sem fluttir eru inn frá Bandaríkjunum en eigendur þeirra gera sér ekki alltaf grein fyrir því. Því eru dæmi um að bílstjórar hafi ekki réttindi til að aka þessum bílum sínum. Ef þeir lenda í umferðaróhappi mega þeir búast við að fá ekki greitt út úr tryggingum hvort sem þeir eru í rétti eða órétti. Amerískir pallbílar verða sífellt vinsælli meðal Íslendinga en á þessu ári hafa 350 bílar verið fluttir inn, jafnmargir og á öllu síðasta ári samkvæmt upplýsingum frá Bílgreinasambandinu. Margir sem standa í þessum innflutningi gera sér þó ekki grein fyrir að sé bíllinn orðinn þyngri en 3500 kíló þarf ökumaður meirapróf til að keyra hann. Lendi ökumaður í slysi, án tilskilinna réttinda, getur hann átt von á bótakröfu frá tryggingafélaginu. Þar sem þessir bílar eru flokkaðir sem vörubifreiðar þá gilda um þá sömu reglur um hámarkshraða og aðrar vörubifreiðar, það er 80 km á klukkustund á þjóðvegum landsins. Innanbæjar gilda reglur um hámarkshraða í þéttbýli, nema annað sé gefið til kynna. Í fyrra voru heimildir rýmkaðar til að leggja mætti bílum upp í 5000 kíló að þyngd í einkastæði innanbæjar. Bílar umfram þá þyngd má ekki leggja á almennum bifreiðastæðum borgarinnar eða í götum eftir klukkan 22 á kvöldin og til klukkan sex á morgnana. Sumir þessara pallbíla geta náð 5000 kílóum og má því í raun ekki leggja þeim nema í sérstæði sem borgin hefur látið gera fyrir vörubifreiðar því þessir bílar falla í flokk vörubifreiða.