Minni hallarekstur en verið hefur

"Það má segja að þetta sé viðunandi árangur og vel innan skekkjumarka," segir Anna Lilja Gunnarsdóttir, framkvæmdastjóri fjárreiðna og upplýsinga hjá Landspítala-Háskólasjúkrahúsi. Samkvæmt fimm mánaða uppgjöri er 67 milljón króna hallarekstur á spítalanum á þessu ári en það er töluvert betri árangur en undanfarin ár. Anna Lilja segir aðhaldsaðgerðir séu að skila árangri en einnig séu núna að nást fram að mestu þau samlegðaráhrif sem stefnt var að upphaflega þegar spítalarnir tveir, Landspítali og Fossvogsspítali voru sameinaðir. "Á móti komu tveir þættir sem höfðu áhrif til hins verra varðandi fjárhaginn. Annars vegar mikil aukning innlagna vegna flensutilfella og dráttarvaxtagreiðslur eru umfram áætlun vegna uppsafnaðs greiðsluhalla undanfarinna ára." Hálfs árs uppgjör spítalans sem gefur mun skýrari mynd af fjárhagsstöðunni en fimm mánaða uppgjörið verður birt um miðjan ágúst.