Munkaklaustur rís á Egilsstöðum

"Okkur sýnis að Egilsstaðir komi einna helst til greina eins og staðan er nú en það á þó eftir að koma betur í ljós," segir séra Jakob Rolland, kanslari biskupsdæmis kaþólsku kirkjunnar hér á landi. Í undirbúningi er að reisa munkaklaustur austur á landi á næstu tveimur árum og eru hér við nám í íslensku fjórir munkar frá Slóvakíu sem taka munu að sér að reisa og reka klaustrið þegar þar að kemur. Jakob segir að enn sé verið að skoða hentuga staði undir klaustrið en Egilsstaðir þyki líklegasti kosturinn á þessu stigi. "Aðalatriðið er að þeir munkar sem hingað komu læri málið til að geta haft samskipti við kaþólska á Austurlandi. Þegar því er lokið munu þeir hefjast handa ásamt fleirum við að byggja það en við gefum okkur tvö ár áður en það tekur til starfa."