Vinnueftirlitið fríar sig ábyrgð

Vinnueftirlit ríkisins segist ekki geta staðið yfir tívolíinu við Smáralind alla daga til að framfylgja því að öryggisreglum sé fylgt. Börn eru þar á ábyrgð foreldra sinna. Vinnueftirlitinu og sjónvarvottum að atviki sem varð í Tívolíinu í fyrradag virðist ekki bera saman. Þrír sjónarvottar sem fréttastofa hefur rætt við fullyrða að einn vagninn í einu tækjanna hafi losnað frá arminum og slegist út utan í aðra vagna sem í var fólk. Georg Árnason hjá Vinnueftirlitinu dregur hins vegar í efa að eitthvað hafi brotnað, segir dekk sem styður við vagninn hafa sprungið og finnst ekki skrítið að fólki hafi orðið hverft við þegar vagninn lamdist við álpallana. Hann minnir líka á að fjórir póstar halda vagninum. Þá segja talsmenn tívolísins að leiktækið snúist með hálfum hraða, fari um 10 kílómetra á klukkustund, ef enginn er við stjórnvölinn. Því geti það sem sjónarvottar halda fram ekki staðist en þeir segja tækið hafa farið tvo og hálfan hring með lausan vagninn, því enginn hafi verið í stjórnklefanum. Einn þeirra, sem starfað hefur í Tívolíi í Bandaríkjunum, gerði einnig athugasemdir við stoðir sem settar eru undir tækin, eins konar kubba, en Vinnueftirlitið fullyrðir að þær uppfylli öryggiskröfur. Kubbarnir geti ekki dottið nema það komi ytri kraftur, t.d. ef bifreið yrði ekið á þá sem ætti ekki að geta gerst.  Öryggiskeðjur voru ekki festar við sum tækin, eða voru einfaldlega ekki til staðar, þegar fréttastofan kom við í Tívolíinu. Georg segir að ítrekað hafi verið við starfsmenn að þær væru notaðar en meira gæti Vinnueftirlitið ekki gert. Sömu viðbrögð fengust hjá Heilbrigðiseftirliti Kópavogs þegar innt var eftir því hvort eðlilegt væri að rafgeymar og rafmagnstöflur stæðu óvarðar. Eftirlitið gæti ekki fylgst með starfsemi tívolísins dag frá degi, en myndu bregðast við ef ábendingar bærust. Og hann minnir á að foreldrar eigi að passa börnin sín.