Harry Potter kominn út

Sala á sjöttu bókinni um galdrastrákinn Harry Potter hófst á miðnætti í nótt. Fyrstu aðdáendurnir voru mættir fyrir utan Mál og menningu á Laugarvegi um klukkan tíu í gærmorgun og fjölgaði eftir því sem leið á daginn. "Ég var líka fyrst í röðinni þegar síðasta bók kom út og ákvað að mæta ennþá fyrr núna," sagði Halla Hallsdóttir, sem mætt var fyrst allra í gærmorgun. Stefnt er að því að bókin komi út í íslenskri þýðingu þann 5. nóvember næstkomandi að sögn Snæbjörns Arngrímssonar, forleggjara hjá bókaforlaginu Bjarti. Þýðandi bókarinnar hafði ekki fengið að sjá handrit bókarinnar í gær, þar sem lögð var mikil áhersla á að halda efni bókarinnar leyndu þar til hún hefði formlega verið gefin út.