Mafían grunuð um stuldinn

Íslenskur saltfiskur og skreið blandast nú inn í rannsókn ítölsku lögreglunnar á umfangsmiklum fiskþjófnaði ítölsku Camorra-mafíunnar sem lætur sér ekki lengur nægja að hagnast af vændi, eiturlyfjum og okurlánum.  Rannsóknin hófst í vor með því að hátt í þrjátíu meðlimir mafíunnar voru yfirheyrðir og kom þá í ljós að einn þeirra var forstjóri ítalska skreiðarinnflutningsfyrirtækisins Jolly Fish, að því er Fiskaren í Noregi greinir frá. Maður í þeirri stöðu hefur vitneskju um allan saltfisks- og skreiðarinnflutning frá Íslandi, Noregi og Færeyjum en heilu gámafarmarnir frá þessum löndum hafa einmitt horfið sporlaust á leið frá skipi til kaupenda. Mikil verðmæti eru í heilum gámi af verkuðum saltfiski á Ítalíu og auðvelt er að selja fiskinn á svörtum markaði þannig að mafíósonum þykir þetta vænleg tekjulind. Farmarnir eru tryggðir og það mun vera að frumkvæði tryggingafélaganna að rannsóknin hófst. Fréttastofunni er kunnugt um að íslenskir útflytjendur hafi ekki farið varhluta af þessu á síðustu árum.