Sumir öryrkjar gætu misst bæturnar

"Samþykktir lífeyrissjóðanna segja að örorkubætur séu til að mæta tekjutapi," segir Matthildur Hermannsdóttir, framkvæmdastjóri greiðslustofu lífeyrissjóðanna. "Við viljum athuga hvort um raunverulegt tekjutap sé að ræða." Landssamtök lífeyrissjóða standa nú að heildarathugun á tekjum þeirra öryrkja sem fá bætur og hefur framkvæmd athugunarinnar sætt nokkurri gagnrýni. Meðaltekjur öryrkja síðustu þrjú ár áður en þeir voru úrskurðaðir öryrkjar verða framreiknaðar til dagsins í dag og í þeim tilvikum sem öryrki hefur hærri rauntekjur nú en fyrir matið verða bæturnar lækkaðar sem umframtekjunum nemur og gætu einhverjir orðið af bótum vegna þessa. Ekki verður hins vegar farið fram á endurgreiðslur að sögn Matthildar. "Þetta er vanhugsuð aðgerð og tekur ekkert tillit til þeirra breytinga sem hafa orðið á almannatryggingakerfinu," segir Arnþór Helgason, framkvæmdastjóri Öryrkjabandalags Íslands. "Það er alls ekki ljóst í okkar huga hvaða aðferðir þeir ætla að nota til að fá endanlega niðurstöðu."