Vogaskóli rifinn að hluta

Yngstu bekkirnir í Vogaskóla koma til með að stunda nám sitt í gömlu verslunarhúsnæði næsta vetur. Verið er að rífa niður hluta skólans og nýtt húsnæði verður ekki tilbúið fyrr en undir árslok 2006. Sá hluti Vogaskóla sem nú er verið að rífa niður var byggður upp úr 1960 og er yngri hluti skólans. Eldri hlutinn, sem einu sinni var samnýttur með Menntaskólanum við Sund stendur áfram. Sá hluti skólans er nú eingöngu notaður af Vogaskóla þar sem nemendum þar hefur fjölgað mjög, og auk þess hefur þurft að setja upp lausar skólastofur á lóðinni. Þeim fjölgar enn og þar sem lóðin er lítil var ekki hægt að bæta enn frekari viðbyggingum við skólann. Því var ákveðið að rífa nýrri hlutann og byggja þar nýtt húsnæði á tveimur hæðum með bílastæði í kjallara. Krakkarnir í fimmta til tíunda bekk verða áfram í eldra húsnæðinu og lausum kennslustofum á lóðinni, en nemendur undir tíu ára aldri verða að færa sig um set. Agnes Björnsdóttir, skólastjóri Vogaskóla segir að húsnæðið við Sólheima sé auðvitað ekki hannað undir kennslu, en þegar búið verði að innrétta það verði allt í lagi að nota það til bráðabirgða uns nýja húsnæðið kemst í gagnið. Það verður líklega ekki fyrr en eftir um eitt og hálft ár eða um áramótin 2006 til 2007.