Nafnalisti fyrir bæjarráð

Nafnalisti þeirra er sóttu um lóðir í nýlegu útboði Kópavogsbæjar vegna Þingahverfis á Vatnsenda var lagður fyrir bæjarráð í gær og mun ráðið nota næstu daga til að yfirfara hann. Um talsvert verk er að ræða enda bárust vel yfir tvö þúsund umsóknir vegna tæplega 150 íbúða og 75 einbýlishúsalóða eða um það bil tíu umsóknir um hverja íbúð. Nokkrir umsækjenda hafa sett spurningarmerki við að ekki voru allar lóðir í útboðsgögnum til útboðs en hjá Kópavogsbæ fengust þær upplýsingar að annað útboð í sama hverfi færi fram í ágúst og þær lóðir að líkindum hluti af því útboði.