Blaðamenn gæti meðalhófs

Stjórn Persónuverndar hefur sent frá sér álit um meðferð persónuupplýsinga og myndbirtingar á fréttamiðlum. Í álitinu kemur fram að fréttamenn skuli gæta meðalhófs í meðferð persónuupplýsinga og hafa í huga hvaða hagsmunum það þjóni að fjalla um einkamálefni einstaklinga án þeirra samþykkis. Sérstaklega er einnig rætt um svokallaðar "opinberar persónur" í áliti Persónuverndar. Þar er sagt að þótt sumar persónur, svo sem stjórnmálamenn, listamenn og aðrir þeir sem mikið eru í sviðsljósinu geti búist við því að meira sé fjallað um þær í fjölmiðlum en aðra almenna borgara, þá sé það álit Persónuverndar að hinar opinberu persónur skuli njóta friðhelgi fjögurra veggja heimilsins og eins utan þeirra á ákveðnum stöðum, svo sem eins og á skemmtistöðum, sundlaugum og líkamsræktarstöðvum. Einnig er minnst á það í álitinu að þótt einhverjir einstaklingar geti talist opinberar persónur þá eigi það sama ekki við um fjölskyldur þeirra, vini eða aðra sem þeim tengjast og hafa ekki valið að vera í sviðsljósinu.