Gísli þekkti morðingja sína

Fimmtíu og fjögurra ára Íslendingur sem var myrtur í Suður-Afríku hét Gísli Þorkelsson. Hann hafði búið í Suður-Afríku í ellefu ár og starfaði á eigin vegum við viðskipti. Hann á einn uppkominn son sem er búsettur á Íslandi. Sá sem fann líkið og gerði lögreglu viðvart hafði leigjanda á sínum snærum sem hafði fengið að geyma tunnu í húsagarði hans í borginni Boksburg um fimm vikna skeið. Þegar farið var að athuga tunnuna var hún full af steypu og stóðu upp úr henni mannsfætur. Leigjandinn, tuttugu og átta ára karlmaður var handtekinn og nokkuru síðar fjörutíu og fjögurra ára kona.   Gísli sem hvarf fyrir fimm vikum hafði nýlega selt íbúð og var með talsvert fé í fórum sínum.  Hann var nýkominn úr fríi frá Bandaríkjunum þar sem hann hafði dvalið ásamt syni sínum hjá systur sinni, Kötlu Donelly, sem búsett er í Philadelphiu. Hún segir að þau hafi átt góðar stundir saman og að hann hafi síðan farið heim til Suður-Afríku í lok maí og að hann hafi ætlað að hringja í hana þegar hann kæmi á leiðarenda. Hún heyrði síðan ekkert í honum og byrjaði að hringja í hann en náði aldrei sambandi. Þá velti Katla því fyrir sér hvort að hann hefði kannski farið í annað ferðalag. Hún vissi síðan ekkert um afdrif bróður síns fyrr en lögreglustjórinn í Suður-Afríku hafði samband við hana á þriðjudagsmorgun. Komment Katla Morðingjarnir sem hann hafði þekkt í nokkurn tíma, keyrðu hann á flugvöllinn og sóttu hann þangað þegar hann sneri aftur. Katla segist hafa vitað um þetta fólk því hún hafði sent þeim upplýsingar um fluferðir hans. Hún sagði að Gísli hafi álitið morðingjan ágætis kunningja sína. Hún sagði einnig að hann hafi ekki verið búinn að þekkja þau lengi Parið sem er í haldi lögreglunnar hafði selt bifreið í eigu Gísla og reynt að ná peningum út af reikningi hans án árangurs. Konan hefur nú játað sinn hlut í morðinu. Katla segir fréttina um morðið hafa verið reiðarslag. Þótt hún hafi ekki heyrt í Gísla um tíma, hefði ekki hvarflað að henni að neitt óeðlilegt væri á ferðinni.