Hrefnukjötið rokselst

Hrefnukjötið rýkur út eins og heitar lummur og eftirspurnin fer ört vaxandi," segir Sólmundur Oddsson innkaupastjóri Kaupáss sem rekur Nóatúnsverslanirnar. "Um síðustu helgi fóru 350 kíló," bætir Sólmundur við en hann er ekki í nokkrum vafa um að markaður sé fyrir því hrefnukjöti sem fellur til við veiðarnar sem nú eru hafnar. "Við höfum í kjötborðum okkar hrefnulundir sem er besta kjötið af hrefnuni og það hefur komið fólki á óvart hvað þetta er gott kjöt. Til dæmis er þetta sérlega gott í sushirétti en þá er kjötið skorið í örþunnar sneiðar og borðað hrátt með wasapikremi og sojasósu. Einnig er hvalkjötið gott á grillið en það ber að hafa í huga að best er að grilla það við mikinn hita í stutta stund," segir innkaupastjórinn. Einnig er boðið upp á hvalkjöt í neytendapakkningum og segir Sólmundur að salan í því sé nokkuð góð enda er verð á hrefnukjöti afar hagstætt.