Gæsluvarðhald fellt úr gildi

Hæstiréttur hefur fellt úr gildi gæsluvarðhald yfir 27 ára gömlum erlendum manni. Maðurinn hafði áður verið úrskurðaður í gæsluvarðhald í héraðsdómi vegna gruns um að hafa framið kynferðisbrot gegn tveimur stúlkum fæddum árið 1994. Önnur stúlknanna var stjúpdóttir mannsins en hin frænka hennar. Í úrskurði héraðsdóms segir að brotin gegn stjúpdótturinni hafi maðurinn framið á árunum 2000 til 2004 en gegn hinni stúlkunni á síðasta ári. Í úrskurði héraðsdóms segir að hætta sé talin á því að maðurinn reyni að hafa áhrif á vitni og þess vegna sé nauðsynlegt að maðurinn sé í gæsluvarðhaldi til 15. júlí. Hæstiréttur féllst ekki á þau rök og felldi úrskurðinn úr gildi.