Konan játar að hafa banað Gísla

Konan sem kom fyrir rétt í dag í Boksburg í Suður Afríku hefur játað að hafa orðið Gísla Þorkelsyni að bana, en frá þessu er greint á fréttavef News 24 í Suður Afríku. Konan og maðurinn voru úrskurðuð í gæsluvarðhald til 22. ágúst eða þar til þau koma aftur fyrir rétt þar í landi. Konan og maðurinn eru sökuð um að hafa myrt Gísla og komið honum fyrir í tunnu fullri af steinsteypu. Þau eru einnig sökuð um fjársvik, en þeim tókst að selja bifreið sem Gísli átti. Parið þekkti Gísla að sögn André Wendermerves rannsóknarlögreglumanns í Boksburg. Gísli var 54 ára gamall og hafði búið í Suður Afríku frá árinu 1994. Hann var ókvæntur en lætur eftir sig einn son.