Met í Norðurá

Veiðifélagarnir Þórarinn Sigþórsson tannlæknir og Ingólfur Ásgeirsson flugmaður veiddu í sameiningu sjötíu og tvo laxa á eina stöng á þremur dögum í Norðurá í vikunni og hefur aldrei fyrr fengist annar eins afli á eina stöng úr ánni. Norðurá hefur þegar gefið um fimmtán hundruð laxa í sumar sem er mun betri veiði en í fyrra og hollið sem hætti á hádegi í gær fékk samtals 250 laxa. Veiði er líka góð í hinum borgfirsku ánum og eru til dæmis komnir 400 laxar úr Langá og í öllum ánum á svæðinu sést óvenjumikið af laxi þessa dagana.