Gjaldfrjáls leikskóli um allt land

Gjaldfrjáls leikskóli er það sem koma skal um allt land, segir sveitarstjóri Súðavíkurhrepps. Frá og með 1. september borga Súðvíkingar ekkert fyrir að senda börn sín í leikskóla. Sveitastjórnin í Súðavíkurhreppi ætlar að gera allt sem í þeirra valdi stendur til þess að laða fólk til sín á næstu misserum. Auk þess að bjóða upp á gjaldfrjálsan leikskóla ætlar sveitarfélagið að afhenda ókeypis lóðir til þeirra sem vilja byggja á Súðavík og þá fá þeir sem ætla að byggja þar líka 17.500 krónur á hvern fermetra af íbúðarhúsnæði. Og þetta er ekki allt því sveitarfélagið ætlar að úthluta allt að þrem milljónum til þeirra sem byrja rekstur og skapa störf á Súðavík. Ástæðan fyrir aðgerðunum er einföld að sögn Ómars Más Jónssonar, sveitarstjóri Súðavíkurhrepps; fólksfækkun og fækkun starfa og stjórninni hafi borið skylda til að bregðast við því. Ómar segir sveitarfélagið standa vel fjárhagslega, enda séu til fimmtíu milljónir sem hafi orðið afgangs undanfarin ár og eins sé eigin staða sveitarfélagsins góð eftir sölu á fyrirtækjum. Góður fjárhagur sé ástæðan fyrir því að hægt sé að ráðst í þessar aðgerðir. Og hann telur að innan skamms muni það ekki þykja tiltökumál að hafa leikskólann gjaldfrjálsan um allt land. Vonast er til að á næstu fimm árum fjölgi íbúum Súðavíkur að minnsta kosti um fjörutíu og að lágmarki tólf stöðugildi bætist við. Gangi þetta eftir muni fjárútlátin koma til baka í formi útsvars. Ómar segir að í svona litlu samfélagi skipti hver fjölskylda miklu máli.