Skipun að ofan um áframhald

Svo virðist sem flokkarnir þrír sem standa að Reykjavíkurlistanum, Samfylking, Vinstri grænir og Framsóknarflokkur, hafi í gær ákveðið að höggva á hnút sem kominn var á viðræður um áframhaldandi samstarf og halda "í skjól" með frekari viðræður. Heimildir blaðsins herma að forystu flokkanna í borginni hafi þótt nóg um fréttaflutning af gangi viðræðna og því hafi komið "skipun að ofan" um að ná skyldi saman um áframhaldandi samstarf. Viðræðunefnd Reykjavíkurlistaflokkanna sendi eftir fund sinn í gær frá sér tilkynningu þar sem sagt var að síðustu vikur hafi átt sér stað gagnlegar viðræður og tekið fram að í gær hafi orðið ákveðinn vendipunktur í viðræðunum. Ákveðið hafi verið að vísa tillögum og hugmyndum sem fram hafa komið í nánari útfærslu og vinnuferli þar sem viðræðunefndin skipti með sér verkum og vænti þess "að ná farsælli niðurstöðu sem síðan verði kynnt borgarbúum". Fyrir fundinn var búist við því að Samfylkingin legði fram tillögu um tilhögun framboðsmála, en hún hefur ekki komið fram. Fólk tengt Reykjavíkurlistaflokkunum vildi lítið láta hafa eftir sér í gær um gang mála. Þó var hreyft við þeirri skoðun að nýleg skoðanakönnun sem Sjálfstæðisflokkurinn lét gera um fylgi framboða í Reykjavík kunni að hafa ýtt á að flokkarnir þjöppuðu sér saman um Reykjavíkurlistann, enda hafi komið fram að listinn nyti fylgis um helmings kjósenda, þrátt fyrir óvissu og umræðu um skipan framboðslista. Steinunn Valdís Óskarsdóttir borgarstjóri sagðist telja góðan gang í viðræðum flokkanna og Alfreð Þorsteinsson forseti borgarstjórnar kvaðst ánægður með fund viðræðunefndarinnar í gær. "Ég er bjartsýnni en áður um að góð lending náist í málinu sem allir flokkar geti sætt sig við," sagði hann og bætti við að allar yfirlýsingar meðan á viðræðum stæði væru frekar óheppilegar. "Í það minnsta ef menn ætla að ná niðurstöðu og þetta vonandi komið í annan og betri farveg að því leyti til."