Gaui vill vinna Mansfield

Guðjón Þórðarson hefur lofað áhangendum Notts County að liðið muni leggja sig allt fram undir sinni stjórn á komandi tímabili, en leikmenn eru að koma saman eftir sumarleyfi um þessar mundir og munu hefja stífar æfingar að hætti Guðjóns til að koma sér í stand fyrir átökin. Á heimasíðu félagsins í gær segir Guðjón að hann muni leggja sig fram við að bæta gengi liðsins eftir fremsta megni og þá einkum og sér í lagi í nágrannaslagnum við Mansfield Town. County hefur tapað þremur einvígjum liðanna í röð og Guðjóni þykir kominn tími á að breyta því. "Það er jafnan allt undir í svona leikjum og erfitt að tapa fyrir grönnum sínum. Það er kominn tími á að Notts County sigri granna sína í Mansfield og ég segi fyrir mína parta að þó svo færi að við töpuðum fyrir þeim vil ég að menn geti sagt að þeir hafi lagt sig alla fram," sagði Guðjón.