Vilja breska mótmælandann lausan

Efnt var til mótmæla fyrir framan Dómsmálaráðuneytið vegna gæsluvarðhaldsúrskurðarins sem Bretinn Paul Gill fékk. Paul var einn þremenninganna sem tók þátt í slettumótmælunum í Nordica-hóteli fyrr í vikunni. Íslendingunum tveimur var sleppt, en Paul var á miðvikudaginn dæmdur í sex daga gæsluvarðhald á Litla-Hrauni. Mótmælendurnir afhentu Birni Bjarnasyni dómsmálaráðherra skjal þar sem úrskurðinum var formlega mótmælt. Mótmælendurnir kváðust ekki skilja hvers vegna Paul fengi aðra meðferð en Íslendingarnir og sögðu enga skýringu hafa verið gefna á því. Þeir kröfðust þess að hann yrði látinn laus. "Hvaða skoðun sem menn hafa á aðgerðunum í Nordica má öllum vera ljóst að þessi úrskurður er hróplegt ranglæti," segir Elísabet Jökulsdóttir, einn mótmælandanna. "Af hverju er ekki tekið jafnt á málum þeirra allra?" Samkvæmt upplýsingum lögreglu voru mótmælendurnir um tuttugu þegar mest var.