Duncan klár í NBA úrslitin

Tim Duncan, leikmaður San Antonio Spurs er klár í slaginn gegn Detroit Pistons í lokaúrslitum NBA og félagar hans eiga ekki til orð til að lýsa ánægju sinni með fyrirliðann, sem er að leika í sínum þriðja úrslitaleik á sex árum. "Lykillinn að velgengni Tim Duncan og það sem ávinnur honum virðingu félaga hans í liðinu, er hversu óeigingjarn hann er. Hann kærir sig kollóttan um það hversu mörg hann stig skorar eða hver tekur stóru skotin og hann deilir boltanum vel með öllum í liðinu," sagði leikstjórnandinn Tony Parker. Duncan var með lægsta stigaskor sitt í mörg ár á tímabilinu í vetur, ekki síst vegna erfiðra ökklameiðsla, en þegar allt er undir í úrslitakeppninni hefur framlag hans í stigaskoruninni verið á hraðri uppleið og hann hefur tekið á sig meiri og meiri ábyrgð á báðum endum vallarins. Robert Horry, sem stefnir á að vinna sinn sjötta meistaratitil á ferlinum, hefur leikið í úrslitakeppninni með mönnum eins og Hakeem Olajuwon og Shaquille O´Neal. Hann segir þó að Tim Duncan skeri sig úr þeim hópi hvað óeigingirni hans og liðsanda varðar. "Tim Duncan lætur leikinn koma til sín. Flestir stórir menn sem ég hef leikið með halda að þeir verði að mestu gagni með því að vera grimmir í sókninni og reyna að skora sem allra mest. Duncan er ekki þannig, hann kemur sér bara inn í flæði leiksins og er alveg sama hvort hann skorar eða ekki ef lið hans bara vinnur leikinn," sagði Horry.