Al-Zarqawi sagður stjórna gagnárás

Al-Qaida samtökin í Írak greindu frá því í yfirlýsingu á Netinu í dag að leiðtogi þeirra, Abu Musab al-Zarqawi, færi fyrir gagnsókn gegn írökskum og bandarískum sem í dag hófu umfangsmikla aðgerð gegn uppreisnarmönnum í Bagdad. Sunday Times greindi frá því í dag að al-Zarqawi hefði hugsanlega verið fluttur til Írans vegna sára sem hann hlaut í árás Bandaríkjamanna á bílalest hans fyrir þremur vikum en stjórnvöld í Íran hafa hafnað því. Þá sögðu al-Qaida samtökin á föstudag að hann væri orðinn heill heilsu og gæti stýrt aðgerðum þeirra aftur. Ekki hefur fengist staðfest hvort yfirlýsingin er ekta en hún er undirrituð af Abu Maysarah al-Iraqi, talsmanni samtakanna í Írak.