Veikt umboð Verkamannaflokksins

Umboð breska Verkamannaflokksins til að stýra Bretlandi er eitt hið veikasta á Vesturlöndum, samkvæmt niðurstöðum nýrrar þarlendrar rannsóknar. Þrátt fyrir að hafa aðeins fengið 35,2 prósent atkvæða í bresku þingkosningunum á dögunum settist Verkamannaflokkurinn á ný í ríkisstjórn. Rannsókn samtakanna Electoral Reform Society, en þau berjast fyrir endurbótum á breska kosningakerfinu, sýnir að á Vesturlöndum hafi einungis ríkisstjórn Tyrkland veikara umboð til að sitja við völd, með 34 prósent atkvæða. Þetta kom fram í breska dagblaðinu The Independent í gær. Minnihlutastjórnir í Svíþjóð, Kanada og á Spáni hafa talsvert meira fylgi á bak við sig en stjórn Tony Blair en engin stjórn á Vesturlöndum hefur skýrara umboð en sú svissneska, sem 71,7 prósent kjósenda studdu í síðustu kosningum. Breskir stjórnarandstæðingar hafa hent niðurstöður könnunarinnar á lofti og segja hana sýna að umboðsleysi stjórnarinnar veiki hana mjög bæði heima og erlendis. Charles Kennedy, leiðtogi frjálsyndra demókrata, hvatti Blair í gær til að halda loforð sitt um endurbætur á kosningalöggjöfinni.