Biður nágrannana um hjálp

Ibrahim al-Jaafari, forsætisráðherra Íraks, skoraði á ríkisstjórnir nágrannalandanna að herða landamæragæslu svo að hryðjuverkamönnum tækist ekki að komast inn í landið. Í það minnsta þrettán manns féllu í árásum í Írak í gær. Í gær greindu bandarískir embættismenn frá því að stærstur hluti hryðjuverka í Írak síðustu vikur hefði verið skipulögð í Sýrlandi af fylgismönnum Abu Musab al-Zarqawi. Fyrr í vikunni lofaði Kamal Kharrazi, utanríkisráðherra Írans, að herða mjög gæslu á landamærum ríkjanna en betur má ef duga skal að mati al-Jaafari. Í borginni Mosul biðu átta manns bana og þrír særðust þegar setið var fyrir þeim fyrir utan heimili írasks þingmanns. Sjónarvottar segja að bandarískir hermenn hefðu tekið þátt í átökunum en ekki er vitað hvað þeir nákvæmlega aðhöfðust. Auk þess dóu fimm aðrir í árásum víðs vegar um landið, meðal annars starfsmenn olíumálaráðuneytisins í Bagdad. Atlantshafsbandalagið tilkynnti í gær að opnun þjálfunarbúða þess fyrir íraska herforingja drægist fram á haustið en NATO hafði gert ráð fyrir að starfsemin gæti hafist snemmsumars.