Ræddust við aftur eftir mánaða hlé

Bandarísk og norðurkóresk yfirvöld ræddust við á föstudaginn og þar hvöttu Bandaríkjamenn Norður-Kóreumenn til að hefja aftur viðræður við fimm ríki, þar á meðal Bandaríkin, um kjarnorkuvopnaáætlun sína. Frá þessu greindi einn talsmanna Hvíta hússins í dag. Viðræðurnar voru óformlegar og fóru fram í New York en slíkar viðræður hafa ekki farið fram síðan í desember. Viðræður Kína, Japans, Suður-Kóreu, Rússlands og Bandaríkjanna við Norður-Kóreu um kjarnorkuvopnaáætlun síðastnefnda ríkisins hafa legið niðri í næstum ár og hafa yfirlýsingar Norður-Kóreumanna um kjarnorkuvopnaeign sína og hugsanlegar tilraunir með kjarnavopn dregið úr vonum manna um að samið verði við þá um að hætta við áætlanir sínar. Þrýst hefur verið á bandarísk stjórnvöld að ræða við yfirvöld í Pyongyang og hefur nú loks orðið af því. Bandaríkjamenn lýstu því yfir í gær að þeir væru fúsir að verða við kröfum Norður-Kóreumanna um tvíhliða viðræður svo framarlega sem þeir féllust á að koma aftur að samningaborði þjóðanna sex.