Skrifar þriðju súpuna

Lítið hefur farið fyrir Tvíhöfða frá því að útvarpsþáttur þeirra var lagður niður ásamt rokkstöðinni Skonrokki. Þeir félagar hafa þó fóstrað Tvíhöfðafréttir í fréttatíma Stöðvar 2, auk þess sem Jón Gnarr er að vinna að leikriti og skrifar fasta pistla í Fréttablaðið. Sigurjón hefur einnig séð um kvikmyndagagnrýni hjá DV og unnið fyrir 365 - ljósvakamiðla, sem reka meðal annars Stöð 2, Sýn og Bylgjuna. Hann vill þó ekki upplýsa að svo stöddu í hverju vinnan felst. "Okkar mál eru dálítið á huldu þessa stundina en ég er að vinna að ákveðinni þróunarvinnu fyrir 365 - ljósvakamiðla. Við erum ekki búnir að loka hurðinni á útvarpið en ef þátturinn færi aftur í loftið yrði hann sennilega ekki í þeirri mynd sem hann hefur verið," segir Sigurjón. "Annars er heilmikil kvikmyndahátíð að byrja svo það verður nóg að gera hjá mér í kvikmyndagagnrýninni." Sigurjón var um tíma virkur í tónlistarlífi landans, fyrst með rokksveitinni Ham og síðar í einmenningssveitinni Olympiu. Hann tók sér langt frí frá tónlistinni en segist vera farinn að huga að henni á ný. "Ég tók mér eiginlega tíu ára frí frá tónlistinni en með endurkomu Ham fór ég að hugsa aftur um hana og er farinn að finna mig í henni á ný," segir Sigurjón en þvertekur fyrir að hann muni endurvekja Olympiu. Spurning er þá hvort Ham verði vakin upp frá dauðum. "Ég játa því hvorki né neita," segir Sigurjón.