NBA í nótt

Tíu leikir voru á dagskrá í NBA deildinni í körfubolta í nótt. Phoenix Suns halda sínu striki og stefna á að ná efsta sæti deildarinnar fyrir úrslitakeppnina, en liðið lagði Houston Rockets í nótt 91-78. Hjá Phoenix var Shawn Marion atkvæðamestur með 23 stig og 18 fráköst, en hann hefur farið mikinn undanfarið. Minnesota liðið er að rétta úr kútnum og vann mikilvægan sigur á Sacramento í nótt 112-100, en þeir eru í harðri keppni um að tryggja sér þáttökurétt í úrslitakeppninni eftir afar dapurt gengi á leiktíðinni. Kevin Garnett var allt í öllu hjá Minnesota eins og oft áður og skoraði 37 stig og hirti 13 fráköst. Lið Golden State Warriors hefur heldur betur rétt úr kútnum eftir að þeir fengu til sín leikstjórnandan Baron Davis og sigrðu sterkt lið Seattle Supersonics á útivelli í nótt, 101-92. Liðið hefur nú unnið 12 af 19 leikjum síðan Davis kom til liðsins og þó að liðið sé út úr myndinni í úrslitakeppninni, lofar koma hans góðu fyrir næsta ár. Philadelphia 76ers eru í hörkukeppni um sæti í úrslitakeppninni austanmegin og þeir unnu gríðarlega mikilvægan sigur á heitu liði Boston Celtics í nótt, 97-93 þar sem Allen Iverson skoraði 38 stig og gaf 9 stoðsendingar.  Cleveland Cavaliers sigruðu Dallas nokkuð örugglega 100-80, en leikurinn var sýndur á sjónvarpsstöðinni Sýn í gærkvöldi. LeBron James var besti maður vallarins og skoraði 37 stig og hirti 10 fráköst.  Indiana Pacers hafa ekki sagt sitt síðasta þó liðið hafi orðið fyrir hverju stóráfallinu á fætur öðru í vetur og í nótt lögðu þeir Washington Wizards 79-76. Milwaukee Bucks afstýrðu níunda tapi sínu í röð þegar þeir lögðu New York Knicks 106-102. Michael Redd var bestur í liði Bucks með 32 stig. Los Angeles Lakers steinlágu fyrir Memphis Grizzlies 102-82 og eru endanlega dottnir út úr myndinni í úrslitakeppninni. Ekki bætti úr skák að Kobe Bryant gat lítið leikið vegna meiðsla sem tóku sig upp á ný hjá honum, en áður hafði liðið þurft að setja Lamar Odom á meiðslalistann og ljóst að hann leikur ekki mikið meira með liðinu á leiktíðinni, sem lýkur fljótlega.