Smátelpur vilja grennast

Áströlsk könnun sem birt var í gær leiðir í ljós að stúlkur virðast hafa áhyggjur af líkamsþyngd sinni mun fyrr en áður var talið. Svo virðist sem strax á fyrstu árum barnaskólans finnist telpum þær vera undir þrýstingi frá jafnöldrum sínum um að grenna sig. Þær telja að því grennri sem þær séu, þeim mun vinsælli verði þær hjá félögum sínum. Rannsóknin birtist í nýjasta hefti British Journal of Developmental Psychology. Fræðimenn við Flinders-háskólann í Ástralíu tóku ítarleg viðtöl við 81 telpu á aldrinum 5-8 ára um þessi mál. 72 prósent þeirra vildu vera léttari og 46 prósent sögðust ætla í megrun ef þær yrðu þyngri. Flestar töldu að grannur líkami færði þeim vinsældir jafnaldra sinna. Telpunum voru einnig sýndar myndir af stúlku sem hafði fitnað síðan hún hóf skólagöngu. Meirihluti þeirra bjóst við að henni yrði strítt fyrir vikið. Aðeins tíu prósent stúlknanna voru í raun og veru yfir kjörþyngd og fæstar þeirra höfðu nokkuð hugsað um þessi mál þegar þær hófu skólagönguna. Fljótlega virtist hins vegar óánægja þeirra með líkama sinn gera vart við sig og þær tóku um leið að sýna megrun áhuga. Annar höfunda skýrsluna, Hayley Dohnt, benti í viðtali við blaðamenn á að upphaf skólagöngunnar væri mikilvægasti atburðurinn í lífi barna á þessum aldri. "Þess vegna virðist hópþrýstingur jafnaldra, sem fram að þessu hefur verið talinn einskorðast við unglingsárin, hafa mun meira að segja fyrir börn á þessum aldri en áður var talið." Áhrif foreldra mættu sín lítils í samanburði við þrýsting jafnaldranna. Næringarfræðingur hjá Breska manneldisráðinu sagði í viðtali við dagblaðið Independent að skýringanna væri líka að leita í dægurmenningunni. "Þarna er loksins komið í ljós hvaða afleiðingar þessi dýrkun á popp- og kvikmyndastjörnum og útliti þeirra getur haft." BBC hefur eftir talsmönnum breskra samtaka gegn átröskunum að sjúkdómurinn hafi verið greindur í átta ára gömlum stúlkum.