Hækkanir á eldsneytisverði

Stóru olíufélögin þrjú, Esso, Skeljungur og Olís, gripu nú um mánaðamótin öll til hækkana á eldsneytisverði. Verðið er óbreytt hjá Atlantsolíu. "Ástæðan fyrir þessu er sú sama og yfirleitt að heimsmarkaðsverð hefur hækkað mikið undanfarið," segir Magnús Ásgeirsson, sem sér um eldsneytisinnkaup fyrir Olíufélagið sem rekur Esso-stöðvarnar. Það félag reið á vaðið í fyrrakvöld og hækkaði verð á 95 oktana bensíni um 1,50 kr. og á dísilolíu um 2,50. Í gær ákvað félagið svo að hækka bensínverðið um eina krónu til viðbótar. Var það sjötta verðbreyting Esso á tveimur mánuðum, en 18. janúar hafði Esso lækkað bensínverðið um tvær krónur. Á Esso-stöðvunum kostar lítrinn af 95 oktana bensíni með fullri þjónustu nú 107,10 kr og á dísilolíu 54,10 kr. Magnús segir verðhækkun á mörkuðum erlendis tilkomna vegna aukinna kulda í Bandaríkjunum en á sjálfur von á að sjá verðlækkun aftur þegar nær dregur vori. Hin stóru félögin tvö, Skeljungur og Olís, hækkuðu verðið einnig á sínum stöðvum í gær og er það nú mjög svipað og á Esso-stöðvunum. Sjálfsafgreiðsluverð á 95 oktana bensíni á stöðvum félaganna þriggja er í kringum 101 krónu. Verðið er óbreytt á stöðvum Atlantsolíu, 97,20 krónur á 95 oktana bensíni.