Sjóvá kaupir hugverk Bubba

Sjóvá hefur keypt hugverk Bubba Morthens. Samningurinn, sem er hinn fyrsti sinnar tegundar á Íslandi, veitir tryggingafélaginu allar tekjur af útvarpsspilun laga Bubba og tekjur af plötusölu hans. Samningurinn á sér fyrirmynd í útlöndum og er kenndur við Pullman, en listamenn á við David Bowie og Rolling Stones hafa gert ámóta samninga. Í honum felst að tryggingafélagið greiðir Bubba Morthens ákveðna fjárhæð sem það fær síðan til baka með því að fá allar stefgreiðslur og greiðslur vegna plötusölu í ákveðinn tíma eða þar til ákveðinni fjárhæð er náð. Tryggingafélagið telur þetta góð viðskipti. Þorgils Óttar Mathiesen, forstjóri Sjóvár, segir að fyrirtækið fjárfesti í skulda- og hlutabréfum en þetta fyrirkomulag sé nýtt á Íslandi. Íslandsbanki hafi séð um að útbúa samninginn en hann sé hluti af áhættudreifingu Sjóvár. Það sé ekki hvaða listamaður sem er sem geti lagt fram jafnfjölbreytilegt og mikið safn af tónlist og Bubbi og því telji fyrirtækið þetta örugga fjárfestingu til framtíðar. Hagnaður tryggingafélagsins, eða munurinn á því sem það greiðir Bubba nú og það sem það fær í sinn hlut, felst í ákveðnum vöxtum eða ávöxtunarkröfu. Bjarni Ármannsson, forstjóri Íslandsbanka, segir að þetta þýði að listamaðurinn fái greitt út fyrir fram það sem áætlað sé að komi inn í stefgjöldum og sölu á útgefnu efni. Gerist þetta hraðar en samningurinn kveði á um greiðist það hraðar til baka og á styttri tíma og listamaðurinn fái aftur það fé sem fæst með stefgjöldum og plötusölu. Gangi hins vegar ekki eins vel og lagt hafi verið upp með taki það aðeins lengri tíma. Bubbi segir þennan samning mikilsverðan, hann veiti sér öryggi og geri sér kleift að sinna listsköpun sinni. Hann hefur eftir sem áður allan yfirráðarétt yfir verkum sínum og ekkert megi gera við þau án hans samþykkis. En hversu langur er þessi samningur og upp á hvaða fjárhæð hljóðar hann? Bubbi segist ekki ræða það nákvæmlega en um sé að ræða tugi milljóna og tiltekinn árafjölda.