Heldur áfram að blóta í haust

Það er eins gott að hlamma sér fyrir framan skjáinn á sunnudaginn þegar síðasti bingóþáttur vetrarins verður sýndur á Skjá einum. "Þetta verður klikkaður lokaþáttur en Bingóið mun örugglega dúkka aftur upp á skjánum næsta haust," segir Vilhelm Anton Jónsson eða Villi bingó. Aðspurður um hvað taki nú við hjá honum segir hann: "Ég hef ekki hugmynd um hvað ég ætla að gera núna. Það er aldrei að vita nema ég byrji að vinna í nýjum sjónvarpsþætti eða fari aftur að vinna á auglýsingastofu. Einnig gæti ég farið að mála eða bara snúið mér að spilamennskunni," segir Villi en eins og flestir vita er hann söngvari hljómsveitarinnar 200.000 naglbítar. Hann hefur einnig komið víða við í sjónvarpinu því auk bingóþáttarins vinsæla hefur hann verið þáttastjórnandi unglingaþáttarins At í Ríkissjónvarpinu og þáttarins Úti að grilla með Kára og Villa á Skjá einum. Villi er afar sáttur við Bingó vetrarins og segir þáttinn hafa fengið frábærar viðtökur. "Þættirnir féllu greinilega vel í kramið hjá landanum og fengu frábærar viðtökur. Ég vil þakka fólki fyrir að taka jafn virkan þátt í Bingóinu og það gerði. Það er fínt að hætta á meðan þetta er enn ferskt og koma sterkur inn næsta haust. Ég vil reyndar biðja alla afsökunar á blótinu í mér í þáttunum en ég get samt lofað því að ég held áfram að blóta næsta haust." Að sögn Villa mega Bingóaðdáendur búast við þrusugóðum lokaþætti á sunnudaginn. "Við gefum bara allt draslið sem við eigum eftir og einnig verða alls kyns hressandi uppákomur og mikið stuð," segir Villi hress eins og alltaf. Hann minnist einnig á leikrit sem hann er að fara að semja tónlist fyrir. "Það verður sýnt í Borgarleikhúsinu, Oddur Bjarni leikstýrir því og það heitir Riðið inn í sólarlagið. Þetta er mjög töff leikrit um lífið og tilveruna og mjög fyndið. Svo er aldrei að vita nema ég sjáist á skjánum í sumar."