Charles sigursæll

Ray Charles hlaut flest verðlaun á Grammy-tónlistarverðlaunahátíðinni í gær, eða alls fimm. Meðal verðlaunanna sem Charles hlaut voru fyrir bestu plötu ársins og það þó að Charles hafi látist á síðasta ári. Það er ekki síst ný kvikmynd um ævi Charles sem blásið hefur nýju lífi í ferilinn en Charles vann að síðustu plötunni sinni fram á dauðadag. Meðal annarra verðlaunahafa voru djasssöngkonan Norah Jones, blúspopparinn John Mayer og Alicia Keys. Athygli vakti að rapparinn Kaney West, sem hlaut fjölda tilnefninga, var sniðgenginn að stærstum hluta.