Stríðið um Smáralind

Spurningakeppninni Gettu betur verður ekki sjónvarpað úr Smáralind þetta árið þar sem Sjónvarpið, Stöð 2 og Smáralind gátu ekki komið sér saman um sanngjarna leigu. Upp úr viðræðum slitnaði í síðustu viku. Sjónvarpshluti spurningakeppni framhaldsskólanna Gettu betur hefst á morgun. Keppnin hefur farið fram í Vetrargarði Smáralindar undanfarin ár en í síðustu viku varð ljóst að ekkert yrði af útsendingum þaðan þetta árið. Um þessar fer þar fram Idol-Stjörnuleit fram og komst Sjónvarpið ekki samkomulagi við forráðamenn Smáralindar og Stöðvar 2 um leiguverð á aðstöðunni. "Við stóðum í þeirri góðu trú að við værum með samning við Smáralind um leigu. Þegar á hólminn var komið reynist svo ekki vera. Stöð 2 var með kröfu um að Sjónvarpið tæki þátt í að greiða hluta af húsaleigu þeirra í Smáralind en við vorum ekki reiðubúin að gera það," segir Bjarni Guðmundsson framkvæmdastjóri Sjónvarpsins. Þar vísar hann til samnings sem Stöð 2 gerði við Smáralind sem kveður á um að ef aðrir fengju afnot af Vetrargarðinum á samningstímanum fengi stöðin afslátt af leigunni. Pálmi Kristinsson, framkvæmdastjóri Smáralindar, segir að málið snúist einfaldlega um að Sjónvarpið og Smáralind hafi haft ólíkar hugmyndir um hvað fælist í sanngjarnri leigu. "Þeir töldu sig ekki reiðubúna að greiða nema það sem við köllum hálfgert líknargjald, nokkrar tugþúsundir króna fyrir hvern útsendingardag." Undanfarin tvö ár hefur Sjónvarpið ekki greitt fyrir að vera í Vetrargarðinum en nú vill Smáralind fá eitthvað fyrir sinn snúð. "Þessi framkoma Sjónvarpsins vakti furðu af okkar hálfu og þetta er viðhorf sem við getum engan veginn fellt okkur við, það er að segja að Sjónvarpið eigi að njóta þjónustu án þess að greiða þar fyrir. Við getum ekki unnið í því umhverfi," segir Pálmi. Bjarni ítrekar að þegar sé búið að gera nauðsynlegar ráðstafanir til að halda keppnina. Viðureignunum verður sjónvarpað frá skólunum sjálfum þar sem því verður við komið og vex kostnaðurinn ekki vegna þessa.