Sker upp herör gegn ósannindum

Impregilo hefur skorið upp herör gegn því sem fyrirtækið kallar ósannar fullyrðingar um starfsemi félagsins. Félagið fór í dag fram á það við Lögreglustjórann í Reykjavík að fram færi opinber rannsókn vegna ásakana á hendur félaginu sem birtust í DV þann 27. janúar 2005, eftir því sem fram kemur í yfirlýsingu frá félaginu. Impregilo segir að í fréttinni sé fullyrt að Impregilo og yfirmenn félagsins hafi látið viðgangast að ákveðinn starfsmaður félagsins hafi með ólögmætum og refsiverðum hætti misnotað aðstöðu sína til þess að neyða undirmenn sína til þess að láta af hendi peninga eða áfengi gegn því að undirmennirnir fengju að vinna yfirvinnu. Að mati Impregilo felur fréttin í sér rangar sakargiftir á hendur yfirmönnum Impregilo og félaginu sjálfu og telur félagið sig eiga lögvarinn rétt á að fram fari opinber rannsókn. Enn fremur segir í tilkynningunni: „Frá því að Impregilo hóf starfsemi við Kárahnjúka hafa ítrekað komið fram ósannar fullyrðingar um félagið sjálft og starfsmenn þess í íslenskum fjölmiðlum. Til þessa hefur Impregilo látið undir höfuð leggjast að bregðast við með þeim hætti sem nú er gert. Rógburður af því tagi sem að ofan nefnir tekur hins vegar út yfir allan þjófabálk og því getur fyrirtækið ekki lengur látið sem vind um eyru þjóta.“