Spennandi að vera kominn heim

Tryggvi Guðmundsson er kominn heim til Íslands eftir að hafa verið atvinnumaður erlendis í sjö ár. Hann hefur nú gengið til liðs við Íslandsmeistara FH, sem hafa styrkt lið sitt mikið og ætla sér stóra hluti í sumar. Tryggvi skrifaði í gær undir þriggja ára samning við hafnfirska liðið og segist sáttur við að vera kominn heim. Tryggvi segir spennandi að vera kominn heim á ný og kveðst alltaf hafa stefnt á að koma aftur til Íslands, þó hann sé að koma fyrr en hann ætlaði sér í fyrstu. "Það er betra að koma heim núna og geta sýnt hvað í mér býr í stað þess að vera kannski að koma hérna eftir fjögur eða fimm ár þegar maður er kominn á bremsuna og getur ekki neitt," sagði Tryggvi léttur í bragði. Nokkur lið höfðu sýnt kappanum áhuga og gert honum tilboð áður en hann ákvað að ganga til liðs við FH-inga og sagði hann nokkur þeirra hafa verið áhugaverð. "Mér bárust svo sem nokkur ágætis tilboð, nokkur þeirra kannski dálítið vafasöm og frá hinum furðulegustu löndum um alla Evrópu. Þegar upp er staðið var þetta ekki spurning um peninga hjá mér heldur meira um fótbolta," segir Tryggvi um komu sína í Hafnarfjörðinn. Hann játar því að önnur félög á Íslandi hafi haft samband við sig en segir ýmsa þætti hafa ráðið því að hann valdi FH. "Leikmenn með metnað vilja náttúrlega fara í bestu liðin og ég tel FH vera með besta liðið. Ég hef líka sterkar taugar til félagsins því að faðir minn er búinn að vera hérna hjá FH-liðinu síðan ég man eftir mér og systkini mín æfa hjá félaginu, þannig að þetta var í rauninni aldrei spurning fyrir mig." Þegar við spurðum Tryggva hvernig hann sæi möguleika nýja félagsins á næsta keppnistímabili var hann bjartsýnn: "Eins og ég sagði tel ég að FH hljóti að vera með besta liðið og ekki skemmir það að við Auðun Helgason skulum vera komnir hingað, ekki bara með reynslu heldur líka einhverja hæfileika. Ég hef því enga trú á öðru en að við verðum í toppbaráttunni hér heima og svo er stefnan auðvitað sett á góðan árangur í Evrópukeppninni," sagði Tryggvi, sem neitar alfarið að tjá sig um viðræður sínar við Stoke City um að fara þangað sem lánsmaður fram á vor. "Núna var ég að skrifa undir samning við FH og er samningsbundinn félaginu til þriggja ára svo að ég vil ekkert ræða um önnur félög á þessari stundu. Það er mikið búið að tala um þetta mál í fjölmiðlum, en ég reyni bara að segja sem minnst. Ef eitthvað gerist í þessum málum - þá bara gerist það".