Segir nýja áætlun spennandi

Þingmaður Frjálslynda flokksins segir það álitshnekki fyrir þingmenn Suðurkjördæmis að Árni Johnsen hafi frumkvæði að því að boða til borgarafundar um framtíð Vestmannaeyja. Framkvæmdastjóri þróunarsviðs Vegagerðarinnar segir nýja kostnaðaráætlun vegna jarðganga til Eyja spennandi. Árni Johnsen hafði frumkvæði að því að láta sænska verktakafyrirtækið NCC gera kostnaðaráætlun um jarðgöng til Vestmannaeyja. NCC telur sig geta borað jarðgöng fyrir um sextán milljarða króna sem er helmingi lægra verð en ráðgjafar Vegagerðarinnar hafa áætlað. Hreinn Haraldsson, framkvæmdastjóri þróunarsviðs Vegagerðarinnar, segir að honum finnist framlag NCC spennandi innlegg í þá umræðu sem hafi verið í gangi. Fyrst og fremst hafi verið birtar nýjar kostnaðartölur en ekkert nýtt sem snúi að tæknihlið verksins. Vegagerðin eigi eftir að sjá gögn NCC og því geti hann lítið sagt á þessu stigi. Hreinn segir kostnaðaráætlun NCC mun lægri en þær áætlanir sem Vegagerðin og ráðgjafar hennar hafi gert og ánægjulegt sé ef þetta sé verð fyrir jarðgangagerð á Íslandi í dag. Tölurnar séu mun lægri en Vegagerðarmenn hafi séð í öðrum verkum. Magnús Þór Hafsteinsson, þingmaður Frjálslynda flokksins, segir á heimasíðu sinni að það sé álitshnekkir fyrir þingmenn Suðurkjördæmis að Árni Johnsen hafi frumkvæði að því að boða til borgarafundar í næstu viku um samgöngumál og framtíð Vestmannaeyja. Magnús segir það gleðitíðindi ef hægt verði að bora göng til Eyja fyrir sextán milljarða. Hann gagnrýnir að ríkisstjórnin hafi ekki haft frumkvæði að því að kanna kosti vegtengingar við Eyjar og telur stjórnarflokkana skorta stórhug og framsýni varðandi málefni Suðurlands. Hnignun Vestmannaeyja sé skýrt dæmi um það.