Neikvæðni í garð nýbúa eykst

Neikvæðni í garð nýbúa meðal íslenskra ungmenna hefur vaxið töluvert upp á síðkastið. Þetta er meðal þess sem kemur fram í rannsókn sem Rauði Kross Íslands birti í dag. Í rannsókninni kemur fram að þeim ungmennum hefur fækkað sem telja að menning nýbúa hafi jákvæð áhrif á samfélagið. Þeim sem telja að áhrifin séu neikvæð hefur aftur á móti fjölgað. Þannig segjast 23 prósent stráka sammála því að áhrif nýbúa séu jákvæð en 31 prósent stelpna. Stærsti hópurinn er óviss en 34 prósent stráka segja að nýbúum fylgi neikvæð menningaráhrif og 20 prósent stelpna eru sömu skoðunar. Rannsóknin var gerð árið 2003 og tók til níundu og tíundu bekkja grunnskóla um allt land.