Vatnselgur í Höfn í Hornafirði

Gríðarlegur vatnselgur lék um miðbæ Hafnar í Hornafirði og næstur götur í gær og ófært gangandi vegfarendum. Látlaus rigning var á Höfn og nágrenni frá morgni föstudags og fram undir kvöld í gær. Sólarhringsúrkoma á Akurnesi mældist 149 millimetrar. Slökkvilið og lögregla unnu hörðum höndum að því að dæla burtu vatni og bjóst lögregla við að sú vinna myndi standa langt fram á nótt. Sjávarhæð var mikil í höfninni í gær og versnaði ástandið í bænum eftir háflóðið sem var upp úr klukkan fjögur. Helgi Már Pálsson bæjarverkfræðingur sagði þrjá dælubíla og tvær stórar rafmagnsdælur hafa verið notuð til verksins og komu á annan tug manna að starfinu. „Það flæddi inn í tíu til fimmtán hús en okkur tókst að halda þessu í horfinu,“ segir Helgi Már. Samkvæmt upplýsingum frá lögreglu varð talsvert um skemmdir í kjöllurum. Til marks um vatnshæðina þar sem hún var mest utanhúss má nefna að vatnið náði fullvöxnum karlmanni upp að nafla. Lukka Magnúsdóttir hefur búið á Höfn síðan 1942 og man ekki annað eins. „Sonur minn sótti mig áðan til að sýna mér þetta og það var nú bara skemmtilegt. Börnin voru öll komin út að busla í vatninu.“ Margir nýttu sér tækifærið til að bregða á leik. Sumir gripu sér ár í hönd og reru um bæinn. Börn busluðu í pollum og spurnir bárust af jeppamönnum sem létu reyna á tryllitækin. Skemmtisýningin Rokk í fimmtíu ár var frumsýnd á Hótel Höfn í gær en að henni stendur Hornfiska skemmtifélagið. Aðstandendur og gestir létu ekki vatsnelginn á sig fá og ætluðu að skemmta sér fram á rauða nótt.