Hætt við að Kárahnjúkavirkjun standist ekki tímaáætlun

Mjög tæpt er orðið að Kárahnjúkavirkjun standist tímaáætlun og má ekkert út af bera í jarðgangagreftri. Landsvirkjunarmenn halda þó enn í vonina um að virkjunin skili orku á tilsettum tíma.

Erfið jarðlög valda því að tveir af þremur risaborum Kárahnjúkavirkjunar hafa lent í alvarlegum töfum. Til að reyna að vinna upp tapaðan tíma var ákveðið í sumar að snúa bor númer þrjú við en það verður fyrst nú í desember sem þeim snúningu lýkur og hann getur byrjað að bora á ný. Þá er bor númer tvö að byrja að snúast á ný þessa dagana eftir fimm vikna töf.

Sigurður Arnalds, upplýsingafulltrúi Kárahnjúka, segir að ekki hafi verið gefin upp sú von að hægt sé að standa tímaáætlun eftir sem áður.

Sigurður segir borana mjög öflugar vélar og ef bergið sé hentugt eigi þeir að geta unnið upp glataðan tíma. Bor eitt hafi til dæmis sett Íslandsmet í borhraða síðastliðinn mánudag þegar hann boraði 83 metra á einum sólarhring, ríflega þrefalt meira en áætlanir miða við. Sigurður segir þetta tvímælalaust orðið mjög naumt og verið sé að taka til aðgerða til að vinna upp tafir. Þeir telja að það takist en ef aftur verður svo mikið misgengi þá geti farið svo að framkvæmdir tefjist meira.

Ef séð er að Landsvirkjun muni ekki takast að afhenda raforku til álvers Alcoa á Reyðarfirði á tilsettum tíma þurfa þessir tveir aðilar að setja niður til samninga. Siguður segir báða aðila fylgjast vel hvor með öðrum. Staðan verði tekið alvarlega fyrir undir vorið eða um páskana. Ef staðan verður erfið þá mun Landsvirkjun þurfa að ganga til samninga við Alcoa vegna þess.