Valgeir væntanlegur

Valgeir Guðjónsson efnir til tónleika í Hveragerðiskirkju, föstudaginn 8. apríl. Tónleikar Valgeirs eru liður í tónleikaröðinni "Kvöld í Hveró" sem Norsk-Íslenska Skjallbandalagið Inc.stendur fyrir. Valgeir Guðjónsson er orðinn órjúfanlegur hluti af íslenskri tónlistarsögu; hugverk hans lifa góðu lífi á meðal þjóðarinnar. Pilturinn greip í gítar móður sinnar einhverntíma á tíunda árinu og hefur haft gítar í seilingarfjarlægð síðan. Bekkjarbróðinn Þórður Árnason var á sama rólinu og fyrstu árin einbeittu þeir félagar sér að lögum með Shadowskvartettinum breska. Þegar Bítlarnir byrjuðu að hljóma var ekki aftur snúið og fyrsta formlega hljómsveitin, Komplex, leit dagsins ljós í Réttarholtsskólanum. Þar var forsöngvari snaggaralegur eldri piltur, Ágúst Atlason sem síðar varð þekktur sem Gústi í Ríó. Á bassa lék Gylfi Kristinsson, síðar kennari í Árnessýslu og íbúi í Hveragerði.  Menntaskólinn í Hamrahlíð gat af sér tvær hljómsveitir sem Valgeir hefur löngum verið kenndur við, Stuðmenn og Spilverk þjóðanna. Hann starfaði með báðum sveitum um árabil en gekk um síðir á eigin vegum, einn og óstuddur og hefur haft þann háttinn á allt frá árinu 1988. Skráð tónverk Valgeirs eru vel á fimmta hundraðið, á hljómplötum, í kvikmyndum, sjónvarpsþáttum og í leikhúsi. Hann hefur það að meginreglu að leika aldrei öll verk sín í einu. Tvær systur, Hildur og Rakel Magnúsdætur, munu hita upp fyrir Valgeir. Hildur tók þátt í Idol Stjörnuleit í vetur og þótti standa sig prýðilega. Þær systur búa báðar í Hveragerði og hafa sungið saman í nokkurn tíma. Jógvan Hansen spilar undir á gítar. Miðaverð er 1500 krónur og hefjast tónleikarnir kl. 21.00 Yfirlýst markmið Kvölds í Hveró er að auka fjölbreytni í menningu á svæðinu, opna augu almennings fyrir þeim möguleika að íslensk popptónlist eigi ekki síður heima í kirkju en klassíkin og gefa ungu og hæfileikaríku tónlistarfólki af Suðurlandi tækifæri til að hita upp fyrir þá listamenn sem fram koma. Hljómburður í Hveragerðiskirkju þykir einstaklega góður. Aðstandendur Kvölds í Hveró er Norsk-Íslenska Skjallbandalagið Inc. sem í eru Ásgerður Eyþórsdóttir, Monica Haug og Ólöf Ingibergsdóttir. Frekari upplýsingar í síma 692 8531. Sala á miðum fer fram í Hljóðhúsinu á Selfossi. Þeir listamenn sem fram munu koma eru: 08. aprílValgeir GuðjónssonHveragerðiskirkjaklukkan 21:0022. aprílFabúlaHveragerðiskirkjaklukkan 21:0006. maíKK og EllenHveragerðiskirkjaklukkan 21:0020. maíEyfi og StefánSelfosskirkjaklukkan 21:0003. júníHljómsveitin HjálmarHveragerðiskirkjaklukkan 21:00