Eitur í gámi

Slökkviliðsmenn í eiturefnabúningum ásamt starfsmönnum Samskipa og áhöfn Akrafells, leiguskips félagsins, unnu í alla nótt að því að ná eiturefnum úr löskuðum gámi og koma í veg fyrir að þau bærust út í andrúmsloftið eða í jarðveg. Þegar losun skipsins átti að hefjast við Vogabakka í Reykjavík í gærkvöldi kom í ljós að stæða með járnrörum hafði fallið ofan á gáminn og laskað hann mjög, þannig að umbúðir eiturefnanna í gámun höfðu skemmst og voru farnar að leka. Fyrst voru allir nærliggjandi gámar fjarlægðir, og svo sá laskaði. Strax varð ljóst að ekki var hætta á eiturefnaskýi og sýrur, sem voru í gámnum, voru ekki mjög skaðlegar. Þrátt fyrir það var ítrustu varúðar gætt og efnunum umskipað í nýjar umbúðir og verður þeim væntanlega eytt. Efni að þessari tegund eru iðulega fluutt til landsins til efnagerðar og var í alla staði búið um þau samkævmt kröfum, en í illviðri sem skipið hreppti á leiðinni hingað komst hreyfing á farminn með þessum afleiðingum.